Assalamu'alaikum Wr. Wb.
Maturnuwun kula aturaken dhumateng Gusti Allah SWT,
ingkang sampun paring pinten2 rohmat dateng inyong lan kanca/sedulur sedaya,
diparingi dalan lancar, bisa rawuh silaturahim, rubungan, dopokan, guyon nang
gelaran winginané kuwé. Muga gelaran kuwé mau sethithik-mendhingé ana
mampangaté kanggo inyong lan kanca/sedulur sedaya, amin...
Maturnuwun kagem pak Kadés Patikraja, Nugroho Adi Wibowo
lan rombongan, sing adoh2 sekang ndésa sampun kersa rawuh nyekséni gelaran ; Inyong
yakin, kuwé mau ora liya jalaran rasa tresnané pak Kadés marang kanca/sedulur
Patikraja Guyub sing agi urip lan pakhal nang paran.
Maturnuwun kagem kanca/sedulur, tua-nom lanang-wadon
gedhé-cilik lsp, sing wis kersa rawuh.
Maturnuwun kanggo kanca/sedulur sing wis partisipasi
nyumbang dana lan dongané...
Maturnuwun kanggo kanca2 pengurus sing wis gelem
kemringet, urun tenaga, pikiran lan nyempetaken wektuné kanggo nyuksesaken
gelaran Silaturahim, kawit mula-buka butul bubar.
Inyong makili kanca pengurus Patikraja Guyub sing duwé
gawé gelaran kiyé, njaluk pangapura angger upamané nganti ora bisa gawé bungah
kanca/sedulur sing adoh2 wis pada kersa rawuh.. utawa mbok menawa sambutan lan
suguhan sekang pengurus kurang sreg lsp, sepisan maning njaluk pangapura..
Inyong lan kanca2 pengurus rumasa égin sinau, sinau
kepriwé gawé guyub kanca/sedulur Patikraja, sinau kepriwé bisa njaga wadhah
paguyuban kiyé tetep langgeng, sinau ngumpulna karepané wong akéh, sinau kepriwé
ngrungokna sing pener. Inyong seneng pisan angger ana kanca/sedulur sing kersa
urun-rembug kanggo langgengé "Patikraja Guyub".
"Memitran, paseduluran nganti tumekaning jejodhowan kuwé, nék siji lan sijine bisa emong kinemong, istingarah bisa sempulur becik. Angger ana'a padudon sepisan pindho kuwé wis aran lumrah, bisa nambahi raketing sesambungan. Nanging sewaliké nék padha angél ngenggoni sifat emong kinemong mau, genah bakal langka langgengé, malah bédaning panemu sethithik baé bisa mérekaken dahuru."
Sedulur... Kaki, nini lan buyut kawit gemiyén kuna wis
duwé penemu lamona urip brayan karo tangga-teparo lan kanca-batir kudu padha
déné goli ngajéni. Senajan gemiyén urung ana sing bisa ngarani nganggo tembung
‘etika’, ningén kaki-nini buyut wis padha nglakoni lan ngerti manfangaté wong
ngurmati maring sepadha-padha. Merga jaman gemiyén urung ngreti teéori sing
denggo neng jaman siki, mula mung cukup nganggo tembung ‘aja gawé gela liyan’.
Tembung presaja aja gawé gela liyan sing metu sekang
prentuling ati bresih lan tulus kuwé senajan katoné gampang, ning urung
kinaruwan saben wong bisa nglakoni; klebu sing wis padha sekolah dhuwur. Sebab
angger kepéngin nglakoni ukarané kaki-nini buyut kuwé ora cukup nganggo teori
sing detulis neng buku. Lan maningé kuwé pancén udu teori sing metu sekang alam
pikir, ningén mujudaken ‘pemahaman’ perilaku sing detuntun neng rasa-pengrasa
[feeling]. Anané bisa nemu ‘pengertian’ kaya kuwé merga landhepé rasa, nganti
ora wani nyenthok maring rasané wong liya. Mulané omong-seomong banjur padha
dejagani ngati-ati kon supayané aja nganti gawé gela maring sepadha-padha.
Piwulange kaki-nini buyut gedhé-ciliké wis molahi grépés,
kalah karo ilmu-pengetahuan modern sing ngendelna ‘efisiensi’ lan tansah golét
bathi seakéh-akéhé goli ngetokan modal sing seirit-irité. Ora ana istilah
peseduluran maning, kabéh deétung nganggo bathi apa tuna. Akibaté akéh sing
padha ninggal pitutur lan piwulang luhuré. Pog-pogané ‘keharmonisan’ neng
masrakat ora patiya deprelokna maning. Pancén godhané wong urip jaman sekiyeé
werna-werna, akibaté akéh sing padha golét dunya-brana nganggo cara sing ora
bener. Menungsa degawe kon supayané butuh maring barang sing sebeneré ora
debutuhna, nganti padha golét dalan werna-werna konsupayané duwé.
Muga-muga kahanan sing kaya kuwé ora kebanjur-banjur
nganti tekan jaman anak-putuné inyong rika padha, Amin Yaa Robbal'alamin...
Sepisan maning, inyong lan kanca pengurus Patikraja Guyub
mung bisa kocap MATURNUWUN.
Wassalamu'alaikum Wr. Wb.
*****
Tidak ada komentar:
Posting Komentar